Viking han tih hi chuan lehkha zir sang lem lo, palian thengthawng, Sam buang leh sei lam, rorum leh huaisen tak, inbeih thiam tak tih hi rilruah a lang ngei ang. Hnam lar tak an ni a, an chanchin hi Documentary, Film leh TV Series ahte pawh tarlangin an chang fo a nih hi. An hmelmate an dim ve vak ngai lovin a lang a. An hmingah hian 'Norsemen' an ti a ni âwm e. Heng hnam rothapte hi Scandinavia rama awm niin an awmna hmun hi vur tamna leh khaw vawt niin a lang.
Lawng tam tak an neia, tuipuia han inkar chhuahte pawh nuam an ti hle. Scandinavia hian tuna Denmark, Iceland, Norway leh Sweden te hi a huam. An eizawnna ber chu Lo neih, huan siam leh ran vulh a ni a. An sumdawnga râl an bei thin bawk. An Lawng hmangin tuifinriatah zin chhuakin Europe ram dang mai bakah North America leh Middle East thlengin an dâi dar bawk. Hnam thenkhat ang bawkin pathian tam tak an nei a, an rinna hi Asa-Faith tiin a hming an vuah. An pathian lar deuh deuhte chu Odin (The AllFather), Thor (god of Thunder), Loki (the god of Mischief), Freyja (the goddess of Love and Fertility) te hi an ni âwm e.
Scandinavia hi Kristian an lo nih hian he rinna hi a bo lek lek a. Kristian an lo tam ta em em mai a ni. Viking hnamah hian hmeichhia pawh pasaltha an ni thei a, an hmingah Shield Maiden an vuah. Viking sawi chuan Thor a khum thin lukhum leh thinga siam Âwmphaw bial hi rilruah a lang ngei ang le. An hmeichhiate hian Europe hmeichhe dang aiin zalenna pawh an nei zau zawk a. An duh chuan an pasalte an ṭhen thiang a, pasal nei lote pawhin an neih hmain mipa an pawl thiang bawk.
Viking tih hming lo chhuahna chu Vikingar tih a ni a. A awmzia chu 'Raider (mi suam ching)' emaw 'Pirate' tihna. Khawvel hian Viking tiin hre mahse anni erawh chuan Viking tih hming hi an inphuah a ni lem lo. Viking te chenna in hi a hmingah 'Longhouse' an ti. A hming ang tak hian a lianin a sei hle bawk. Viking Longhouse zinga sei ber chu Borg a Chiefdom a ni a, Feet 273 laia sei a ni. Longhouse hi a len poh leh a chhunga chengte an tamin an hausa tihna a ni mai. Lehkha la nei lo mahse an chanchin hi an chhehvela lungahte an ziak ve ṭeuh tho.
An zu te chu ramsa ki hmangin an in mai thin a, a dawng hlawk phianin a rinawm. Tuifinriat fâwn nasa leh nelawm loh tak takahte hian an lawng hmanga an zin fo thin avangin an lawng hi a rintlak viau niin a lang. Lawng hi chi hnih a awm a. Chungte chu Sumdawng lawng leh indo lawng an ni. Sumdawng lawngte pawh hi a ṭul chuan indona atan pawh a hman theih tho. Chubakah lawgte hi mitthi ruang hala inphumna atan an hmang leh a. Mi hausa leh awmthei chhungkuate phei chu film a kan hmuh thin ang hian an ruang chu lawngah an hal mai thin. An hal lai chuan lawng chu tuipui lam panin a chhuak a, an thlir thup thin niin a lang.
Viking te hian ki nei helmet an khum thin niin an sawi a. Mahse, hetiang helmet hi an hmu tam vak lo tlat. An rin dan phei chuan mi hausa leh mi pawimawhte chauhin helmet hi an khum thin. An rin leh danah chuan helmet te hi pain a fa a pechhawnga, an inrochun ta zel niin a lang. An ralthuam hi hreipui leh Fei an ni a. Ngunhnâm hi chu sipai challang chin chauhin an nei niin an hria. Hmanlai Mizote'n pialral a awm an rin ang thovin Viking ho pawh hian an pialral ve chu 'Valhalla' a ni a. He hmunah hian faisa ringin an awm hle hle tawh mai dawn a, chubakah hmeichhe hmeltha leh piannalh tak tak Valkyrie an tihte nen an lengza tawh dawn a ni.
He Valhalla hmuna chengte chu nilengin an insual anga. Mahse, an hliam leh pemte chu tlaiah an tidam leh vek thei thung dawn a ni. Tichuan, zankhuain hlimhlawp an bawl tawh bawk ang. An ngaihdan hi a rorum hle mai a. He hmunah hian indonaa boralte chauh an lut thei ang. Khawsik leh dam lohna avanga thi leh tar kuna thite chuan hremhmun an pan dawn thung. Hnam dang tam tak ang bawkin Sal (Slave) an nei thin a. Hralhin an leia hna hahthlak tak tak an thawhtir thin. Midangin an lei chhawn chiahin anmahni neitute lak atangin an zalen thei a. Ran nen an dinhmun a inang áwm e.
Salte hi mipat hmeichhiatna pawh an hmanpui thiang a. Hmeichhe chhe lo deuhte phei chuan a neitute duhsak an hlawh ve thin viau. Chubakah thiam(talent) nei mipate pawhin duhsak an hlawh ve thin bawk. An chenna in hi chi hnih a awm a - Longhouse leh Pithouse. An intifai peih hle a, tuikhur lum (Hot spring) ah an inbual fo thin. An hun tam ber hi huan leh lo lamah hna an thawk. An ralthuam lar ber chu Hreipui niin he Lei (Earth) hi Midgaard an ti bawk. Viking hunlai hi 793 - 1066 AD niin an chhût. An ṭawng hman hi Norse ṭawng a ni bawk.
0 Comments